रायपुर, छत्तीसगढ़ 6 अगस्त 2025
छत्तीसगढ़ के राजधानी रायपुर ले एक सनसनीखेज अउ बहुतच गंभीर खबर सामने आय हे। शहर के बीचोंबीच शंकर नगर इलाका म नकली पनीर बनाय के एक अवैध फैक्ट्री के भांडा फोड़ होइस हे, जऊन ह न केवल कानून के संग खिलवाड़ करथे, बल्कि लोगन के सेहत के संगो बड़ा धोखा करथे।
स्वास्थ्य विभाग अउ खाद्य सुरक्षा विभाग के संयुक्त टीम मिलके कार्यवाही करत ये गोरखधंधा ला पकड़े हवंय। जांच म पता चलिस के ये फैक्ट्री एक नाला के ऊपर चलत रिहिस — जहाँ सफाई के कोई नाम-ओ-निशान नइ रहिस।
जानकारी के मुताबिक, रामानंद बाघ नाव के मनखे ये नकली पनीर बनाय के धंधा चलावत रिहिस। ओ फैक्ट्री म पाम आयल, फैट अउ दूध पाउडर ला मिक्स करके नकली पनीर बनावत रहिन। ए पनीर ला सिरिफ रायपुर म नइ, बल्कि ओडिशा तक के ढाबा अउ होटलों म बेचा जात रहिस।
सबले जियादा चौंकाय वाली बात ये रहिस के, ये नकली पनीर ला पुराना मछली रखे जाय वाला थर्माकोल के डिब्बा म पैक करथें — जऊन ह सड़ल, गंदा अउ बदबूदार रहिस। ए तरिया के पैकिंग म पनीर दूषित हो जावत रहिस, जऊन ह सीधा लोगन के जान के खतरा बन गे रहिस।
कार्रवाई के दौरान बड़ मात्रा म नकली पनीर, कच्चा माल अउ पैकिंग समान जब्त करे गे हे। सगरी सैंपल ला जांच खातिर भेजा गे हे। अधिकारी मन कहिन के रिपोर्ट आथे के बाद दोषी मन ऊपर कड़क कानूनी कार्यवाही होही।
खाद्य सुरक्षा अधिकारी कहिन के ए जइसन कार्यवाही आगे घलो जारी रही।
इलाका के लोगन प्रशासन ले मांग करथें के ए प्रकार के फैक्ट्री मन ऊपर सख्त नजर राखे जावय।
शहर म नकली अउ मिलावटी खाद्य समान बनाय वाला ये गिरोह न सिरिफ कानून के उल्लंघन करथे, बल्कि लोगन के जान संग खुलेआम खिलवाड़ करथे। ए प्रकार के मामला म कड़ा सजा अउ सतत निगरानी जरूरी हे।