रायपुर, छत्तीसगढ़ – 4 अगस्त 2025
राजधानी रायपुर म मोबाइल लूटे वाले दू लुटेरा मन ला अदालत ह आजीवन कारावास के सजा सुनाइस हे। सजा के संग-संग दुनो लुटेरा मन ऊपर जुर्माना घलो ठोके गे हे। कोर्ट ह ए घटना ऊपर सख्ती ले टिपण्णी करत कहिस के आम आदमी के जान-माल के सुरक्षा ला लेके बहुत चिंता के बात हे। कोर्ट ह दुनो आरोपियों ऊपर 40 अउ 50 हजार रुपिया के जुर्माना घलो लगाए हे।
ए घटना तीन बछर पहिली रायपुर के गुढ़ियारी थाना इलाका के आय। एक झन जवान देवेंद्र साहू 1 सितंबर 2022 के भोर म मॉर्निंग वॉक बर निकले रिहिस। गोंदवारा के एकता नगर के लगे जब ओ ह चहल कदमी करत रिहिस, त उहां दू बदमाश एक्टिवा म सवार होके आइस, ओकर कॉलर पकड़िन अउ जेब ले चाकू निकाल के हमला कर दीन। जब देवेंद्र चाकू ला पकड़े के कोसिस करिस त ओकर हथेली कट गीस। ओ बखत बदमाश मन देवेंद्र के मोबाइल लूट के एक्टिवा ले भाग गइन।
देवेंद्र ह सूझ-बूझ ले एक्टिवा के नंबर नोट कर ले रिहिस, जेकर आधार म ओ ह थाना म रिपोर्ट दर्ज कराइस। पुलिस ह एक्टिवा नंबर के आधार म दू बदमाश ला धर डारिस अउ देवेंद्र के पहिचान के बाद दुनो ऊपर FIR दर्ज कर के जेल भेज दे गीस।
ए मामला के सुनवाई रायपुर जिला कोर्ट म होइस। कोर्ट ह शेख शब्बीर अउ आशीष मिर्जा ला आजीवन जेल के सजा सुनाइस अउ जुर्माना घलो ठोके गे हे। ए सुनवाई अपर सत्र न्यायाधीश शैलेश शर्मा के अदालत म होइस।
