रायपुर, 5 अगस्त 2025
छत्तीसगढ़ के राजधानी रायपुर ले सुरू होके, अब पूरे राज म बिजली खरचइया मन ला सरकार के नवा फैसला ले जबरदस्त झटका लगिस हे.राज सरकार “बिजली बिल हाफ योजना” म बदलाव करत, अब छूट के सीमा ला 400 यूनिट ले घटाके सिरिफ 100 यूनिट महिना कर दिस हे.ए बदलाव के असर सीधे-सीधे 20-22 लाख उपभोक्ता मन ऊपर परही, जे मन पहिली ये योजना के लाभ लेवत रहिन.
का हे बदलाव?
अब तक जे मन के महिना म बिजली खपत 400 यूनिट या ओसे कम रहिस, तेन मन ला बिल आधा मिलत रहिस.
अब ओ सीमा सिरिफ 100 यूनिट कर दिये गे हे.अउ जेन मन के खपत 101 यूनिट ले जादा होही, उ मन अब हाफ बिल योजना के लाभ ले बाहर हो जाहीं.सरकार के कहना हे के संशोधित योजना के बादो, राज के 45 लाख उपभोक्ता मन म ले 31 लाख उपभोक्ता, जे मन सामान्य अउ कमजोर वर्ग ले हवंय, उ मन ला पहिली जइसने लाभ मिलत रही, तइसने अब घलो मिलही. सरकार ए घलो कहिस हे के ये बदलाव राजस्व संतुलन अउ बिजली के बचत ला ध्यान म रखके करे गे हे.
जनता का कहिथें?
गांव अउ सहर म रहइया लाखों उपभोक्ता मन योजना म कटौती ऊपर नाराजगी जताइन हे.पहिली ले बिजली दर बढ़ गे हे अउ अब हाफ बिल म सीमा घटाना ए जनता के जेब ऊपर दोहरी मार के जइसने असर करथे.
राजनीतिक बवाल
ए फइसला के बाद राज म राजनीति घलो गरमागे हे.कांग्रेस पार्टी एला जनहित म गलत बतावत कहिस हे के वो मन ए ऊपर जन आंदोलन करहीं.कांग्रेस नेतामन कहिथें. गरीब अउ निम्न-मध्यम वर्ग ला जे राहत मिलत रहिस, अब वो मन ला भारी असर परही.
निष्कर्ष
अब देखे के बात ए होही के सरकार अपन फैसला ऊपर टिके रहिथे या जनता अउ विपक्ष के दबाव म कुछ राहत देथे.
