दुर्ग । छत्तीसगढ़ 6 अगस्त 2025
राखी बंधई भई-बहिनी के मया, भरोसा अउ समर्पन के तिहार ये। फेर ए साल दुर्ग जिला के वैशाली नगर म ए तिहार के नजारा कुछु अलगच रहिस। गली-गली म, मोहल्ला-मोहल्ला म अउ विधायक निवास म एक ठन एहरिस दृश्य देखे बर मिलिस, जऊन ला देखके मन हर गदगद होगे।
असल म, वैशाली नगर के विधायक श्री राकेश सेन ला ए साल राखी बंधई म बहिनी मन के एतका मया अउ आशीर्वाद मिलिस, जऊन ए तिहार ला बनेच बिसेस बना डारिस। विधायक निवास म बहिनी मन राखी बांधइ बर कतार म लग गइन। ए दृष्य एतका सुंदर रहिस के जइसने पुरा मोहल्ला ह राखी मनाए बर एकजूट होगे होय।
सोशल मीडिया म एक वीडियो घलो घुमत हवय, जेमे साफ-साफ देखे जाथे के राकेश सेन ला बहिनी मन चारो कोती ले घेर लीन। कोनो राखी बांधत रहिस, कोनो तिलक करत रहिस, कोनो मिठाई खवावत रहिस, अउ कोनो नारियल अउ आरती के थारी लेके खड़े रहिस। बहिनी मन के संख्या एतका रहिस के राकेश सेन ला दुनो हाथ म राखी बंधवाना परगे।
राकेश सेन घलो, हर एक बहिनी के बड़े स्नेह अउ आदर ले राखी बंधाइन, आशीर्वाद लीन अउ मिठाई बाँटिन। ए समय म हाजिर मनखे मन के आंखी म खुशी के आँसू साफ देखे जा सकत रहिस।
ए अवसर म राकेश सेन कहिन:
“मोला बहुतच सौभाग्य के बात लगिस के अतका बहिनी मन के मया अउ आशीर्वाद मोला मिलिस। ए राखी के धागा सिरिफ धागा नइ ये, ए मोर बर विश्वास, अपनापन अउ मया के चिन्हारी आय। में हर एक बहिनी ला दिल से धन्यवाद देवत हंव।”
राखी बंधई के ए बिसेस मौका म वैशाली नगर म दिखे ए दृश्य सिरिफ एक विधायक अउ जनता के नाता नइ, फेर जनता के भरोसा के घलो बड़का मिसाल आय। राकेश सेन अउ बहिनी मन के ए अनोखा मिलन ए बात ला फेर एक बेर साबित कर दीस के राजनीति ले ऊपर घलो एक दुनिया होथे – जिहां मया, सम्मान अउ इंसानियत के राज चले हे।