अंबिकापुर, छत्तीसगढ़। 24 अगस्त 2025
अंबिकापुर जिला के माता देवेंद्र कुमारी मेडिकल कॉलेज ले एक वीडियो गुरुवार के दिन सोशल मीडिया मा जबरदस्त वायरल होईस हे। ए वीडियो म एक महिला मरीज ला दिखाए गे हे, जेकर हालत गम्भीर हे अउ ओकर नाक म ऑक्सीजन पाइप लागे हावय। मरीज ला स्ट्रेचर म लिटाय गे हे, फेर चौंक देय वाली बात ये आय के मरीज ला खुदे ओकर परिजन स्ट्रेचर धकेलत, अस्पताल के रोड पार करत नजर आवत हें।
बताय जात हे के अस्पताल के मुख्य बिल्डिंग ले वार्ड तक के दूरी करीबन 300 मीटर के हे। ये दूरी ला पार करत, मरीज के परिजन ओला धकेल-धकेल के ले गिस अस्पताल के मुख्य बिल्डिंग तक। ए दौरान न त अस्पताल के कोनो कर्मचारी दिखे, न ही कोनो एम्बुलेंस के सुविधा नजर आईस।
कई मरीज अउ परिजन ले बातचीत करिन। उंकर कहना हे के अस्पताल म सुविधा के बहुत कमी हे। मरीज मन ला खुदे अपन दम प अस्पताल के अंदर तक लाना पड़थे। खास करके जे मरीज गंभीर हालत म रहिथें, उंकर तकलीफ अउ बढ़ जाथे।
एक परिजन बताइस
“हमन गांव ले आय हवन। महिला के हालत खराब रहिस। अस्पताल पहुंचन के बाद कऊनो मदद नइ मिलिस, त हमन खुदे ओला स्ट्रेचर म रखके अस्पताल के बिल्डिंग तक ले गे हन।”
प्रशासन के जवाब
जब ए घटना के बारे म अस्पताल प्रबंधन ले पुछताछ होइस, त उंकर कहना रहिस के –
“हमन मामला के जांच करत हन। अगर कोनो स्टाफ ड्यूटी म लापरवाही करिस हे, त ओकर खिलाफ कार्रवाई होही।”
ए घटना एक बेर फेर अस्पताल व्यवस्था ऊपर सवाल खड़ा कर दे हावे। मरीज अउ परिजन मन ला अस्पताल मा जिहां इलाज के सुविधा मिलना चाही, उहां खुदे अपन मरीज ला स्ट्रेचर म लेके 300 मीटर चलना पड़त हे – ये बात गम्भीर चिंता के विषय आय।