सरगुजा । छत्तीसगढ़ 6 अगस्त 2025
छत्तीसगढ़ के राजनीति के गलियारा ले एक चौंकादे खबर बाहिर आय हे। राज के पूर उपमुख्यमंत्री अऊ कांग्रेस के वरिष्ठ नेता टी.एस. सिंहदेव के निज निवास मं चोरी होइस हे। ए घटना रविवार के रात, 3 अगस्त के रतिहा लगभर 1 बजे के आय।
मिलत जानकारी मं कहे जावत हे के चोरी के ए घटना सरगुजा जिला के अंबिकापुर मं स्थित सरगुजा पैलेस परिसर ले लगे कोठीघर मं होइस हे। ओहां एक अज्ञात चोर घुस गे अऊ पीतल ले बने एक हाथी के मूर्ति ला चुरा के ले भाग गे। ए मूर्ति सिंहदेव परिवार बर एक खास प्रतीक अऊ ऐतिहासिक महत्व वाला चीज रहिस।
सीसीटीवी फुटेज मं का दिखिस?
पूरा घटना के तसवीर सीसीटीवी कैमरा मं रिकार्ड हो गे हे। वीडियो मं साफ देखे जावत हे के रात एक बजे के बेरा एक मनखे कोठीघर के भीतरी मं घुसथे अऊ कुछ देर मं ओ मूर्ति ला लेके बाहिर निकल जाथे। ए चोरी सिरिफ कुछ मिनट के भीतर मं कर डारे गे।
सूत्र मन कहिथे के ओ परिसार मं सुरक्षा के कुछ व्यवस्था तो रहिस, फेर ए घटना सुरक्षा मं होवत चूक ला उजागर करत हे। ओ इलाका कोतवाली थाना क्षेत्र मं आवत हे अऊ पुलिस मामला दर्ज करके जांच सुरु कर दे हे।
पुलिस के करवाई:
कोतवाली पुलिस सीसीटीवी फुटेज के आधार मं जांच सुरु कर दीस हे। फॉरेंसिक टीम घलो मौके मं पहुँच गे हे अऊ नमूना जांच बर जुटावत हे। पुलिस संदिग्ध मन के पहचान मं लागे हे अऊ अगल-बगल के इलाका मं पूछताछ घलो होवत हे।
टी.एस. सिंहदेव, जऊन ल लंबे बखत ले छत्तीसगढ़ के राजनीति मं एक मजबूत चेहरा के रूप मं देखे जाथे, ओ मन के घर मं ए तरह के घटना होय, प्रशासन बर एक बड़े चुनौती बन गे हे। अब देखना हे के पुलिस चोर तक कतेक जल्दी पहुँच पाथे।