रायपुर। छत्तीसगढ़ 4 अगस्त 2025
छत्तीसगढ़ के राजधानी रायपुर ले अब बड़ी अउ सनसनीखेज खबर बाहिर आय हे.
रायपुर पुलिस अंतरराष्ट्रीय ड्रग्स तस्करी के एक बड़े गिरोह ला पकड़ाय हे.
टिकरापारा पुलिस अउ ACCU के टीम मिलके जॉइंट कार्रवाई करत 9 संदिग्ध मन ला धर दबोचे हे.
इन मन ले भारी मात्रा म हेरोइन जप्त होइस, जेनकर अंतरराष्ट्रीय बाजार म कीमत करीबन एक करोड़ रूपिया बताय जात हे.
रायपुर पुलिस के ये बड़ी कार्रवाई टिकरापारा इलाका म होइस, जऊन लंबे बखत ले नशा के अवैध धंधा के अड्डा बने रहिस.
पुलिस ला गुप्त जानकारी मिलिस के कुछ लोग हेरोइन के बड़े खेप ले ए इलाका म सक्रीय हे.
पुलिस अउ ACCU के टीम जब छापा मारिस, त ओ मन के कब्जा ले 412 ग्राम 87 मिलीग्राम हेरोइन जप्त होइस।
ए हेरोइन के कीमत बाजार म करीब एक करोड़ रूपिया के आसपास बताय जात हे.
SP रायपुर कहिन:
“हमन कई दिन ले ए मन ऊपर नजर रखे रिहिन। आज के कार्रवाई म 9 लोग पकड़े गे हें, जेन म कुछ मन के कनेक्शन दूसर राज्य अउ अंतरराष्ट्रीय गिरोह ले हो सकथे। पूछताछ जारी हे, अउ अउ घलो गिरफ़्तारी हो सकथे.”
पकड़े गे आरोपी मन ले पूछताछ म कई चौंकादे वाला बात निकल के आइस.
कहे जात हे के ए गिरोह मोबाइल अउ सोशल मीडिया एप्प के सहारा ले नशा के तस्करी करत रहिस.
इन मन के संग हेरोइन, मोबाइल फोन, नगद रकम अउ कुछ संदिग्ध कागजात घलो जप्त होइस.
ए कार्रवाई पुलिस के चौकसी के साफ संकेत देथे, अउ ए घलो बताथे के अब नशा के सौदागर मन ला छोड़े नइ जाही.
फिलहाल पुलिस पूछताछ करत हे अउ पूरा नेटवर्क के जड़ तक पहुंचे के कोशिश म हे.