जगदलपुर। छत्तीसगढ़ 4 अगस्त 2025
जगदलपुर ले एक गजब दुखद खबर सामने आए हे। जिला के एक पत्थर खदान म भरे बरसात के पानी म डुबई से दू झिन नन्हा बच्चा मन के मौत हो गे हे। ये दुर्घटना ले पूरा इलाका म शोक के माहौल हे।
घटना अतवार के दुपहरिया के बताय जात हे, जब दूनो बच्चा अपन घर के बगल मं खेलत-खेलत खदान के इलाका म पहुँच गेन। भारी बरसात के कारन खदान के गड्ढा पानी ले भर गे रिहिस, फेर बच्चा मन ला ये खतरनाक बात के अंदाज नइ रिहिस।
गांव वाले मन के कहे म, जब बच्चा मन अचानक गायब हो गेन, त परिवार वाले मन ओ मन के खोजबीन शुरू करिन। थोरिक देर म गांव के मनखे मन ला खदान म तैरत बच्चा मन के चप्पल दिखे, तब संदेह अउ बढ़ गीस।
फेर गांव वाले मन तुरते प्रशासन ला खबर दींय। SDRF के टीम घटना स्थल म पहुँचिस अउ गांव वाले मन के संग मिलके खोजबीन के काम चालू करिन। करीब दू घंटा के मेहनत के बाद दूनो बच्चा मन के लाश गड्ढा ले बाहर निकाले गीस।
लाश मन ला पोस्टमॉर्टम बर मेडिकल कॉलेज भेज दी गे हे। घटना के बाद पूरा गांव म मातम छा गे हे। परिवार के हालत बहुत खराब हे, रो-रो के बुरा हाल हो गे हे।
एहीच म, स्थानीय प्रशासन जांच के आदेश दे दीस हे। अब ये सवाल उठत हे कि बरसात के बखत मं एखर जइसन खुले खदान मन ला सुरक्षित काबर नइ रखे गे अउ बच्चा मन ओतका कैसे पहुँच गे?
ए दुर्घटना फेर एक बेर दिखा दिस कि सुरक्षा के उपाय ला अनदेखी करना कतका भारी पर सकत हे, खास करके मासूम जिनगी बर।
हमर बिनती हे कि अइसन दुखद घटना ले बचे बर प्रशासनिक चौकसी अउ गांव के जागरूकता, दुनो जरूरी हे।