मुख्यमंत्री विष्णुदेव साय के अध्यक्षता म बुधवार के कैबिनेट के बइठका होइस. सब्बो मंत्री के मौजूदगी म सरकार ह कतकोन महत्वपूर्ण फइसला लिस. नवा रायपुर के परसदा म क्रिकेट खिलाड़ी मन बर एकेडमी बनाये जाही. एकर स्थापना बर 7.96 एकड़ भूमि आबंटित करे गीस हे.
कैबिनेट बइठका म ये प्रस्ताव ल स्वीकृति मिलिस हे. उहे छत्तीसगढ़ म सरलग अवैध खनन-परिवहन मामला ल देखत हुवे रेत खदान बर जमीन आवंटन के प्रक्रिया म घलो बदलाव करे गीस हे. प्रस्तावित नियम म संशोधन के बाद अब आवंटन के कार्रवाई इलेक्ट्रॉनिक नीलामी के माध्यम ले होही.
उही तरह भारत माला परियोजना म अनियमितता के बाद सरकार ह महत्वपूर्ण फइसला लिस हे. कृषि भूमि के बाजार मूल्य के गणना बर 500 वर्गमीटर तक के भू-खंड के दर ल खत्म करत हुवे पूरा रकबा के गणना हेक्टेयर दर ले करे जाही.
एकर पहीली 12 जुलाई के साय कैबिनेट के बइठका होये रीहिस. जेमा छत्तीसगढ़ पुलिस सेवा के 2005-2009 बैच के अफसर ल सीनियर सिलेक्शन ग्रेड पे स्केल दे 30 पद स्वीकृत करे गे रीहिस. छत्तीसगढ़ म पुराना गाड़ी के नंबर नवा वाहन म ट्रांसफर हो सकही. शासकीय वाहन म शुल्क नी लगही.
